ଭଞ୍ଜନଗର ପୋଲିସକୁ ବଡ଼ ସଫଳତା

ଡକାୟତି ଯୋଜନା କରୁଥିବା ଅଭିଯୋଗରେ ୪ ଜଣ ଗିରଫ, ଚୋରି ଅଳଙ୍କାର ସହ ବାଇକ୍ ଓ କାର୍ ଜବତ ଭଞ୍ଜନଗର, ଗଞ୍ଜାମ

ଗଞ୍ଜାମ ଜିଲ୍ଲାର ଭଞ୍ଜନଗର ପୋଲିସକୁ ମିଳିଛି ବଡ଼ ସଫଳତା। ଡକାୟତି ଯୋଜନା କରୁଥିବା ଅଭିଯୋଗରେ ଚାରି ଜଣ ଯୁବକଙ୍କୁ ଗିରଫ କରିଛି ଭଞ୍ଜନଗର ପୋଲିସ। ଗିରଫ ଅଭିଯୁକ୍ତମାନଙ୍କ ନିକଟରୁ ଚୋରି ଅଳଙ୍କାର ସମେତ ଏକ ବାଇକ୍ ଓ ଏକ କାର୍ ଜବତ କରାଯାଇଥିବା ସୂଚନା ମିଳିଛି। 

ସୂଚନା ଅନୁଯାୟୀ, ଭଞ୍ଜନଗର ଥାନା ଅନ୍ତର୍ଗତ ଜାମପଲ୍ଲୀ ରୋଡ୍‌ର ଶ୍ରୀରାମ ନଗର ଅଞ୍ଚଳରେ କିଛି ଯୁବକ ଡକାୟତି ଯୋଜନା କରୁଥିବା ଅଭିଯୋଗ ହୋଇଥିଲା। ଏହି ସମୟରେ ପୋଲିସ ଚଢ଼ାଉ କରି ଚାରି ଜଣଙ୍କୁ ଗିରଫ କରିବାରେ ସଫଳ ହୋଇଥିଲା।  ପୋଲିସ ସୂଚନା ଅନୁସାରେ, ଗିରଫ ଅଭିଯୁକ୍ତମାନଙ୍କ ନାମରେ ବିଭିନ୍ନ ଥାନାରେ ଏକାଧିକ ଡକାୟତି ମାମଲା ରହିଥିବା କୁହାଯାଇଛି। ଏହି ଘଟଣା ସହ ଅନ୍ୟ କୌଣସି ଅପରାଧର ସମ୍ପୃକ୍ତି ରହିଛି କି ନାହିଁ, ସେନେଇ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି। ଏନେଇ ଭଞ୍ଜନଗର ପୋଲିସର ଅତିରିକ୍ତ ଆରକ୍ଷୀ ଅଧୀକ୍ଷକ ଗଣମାଧ୍ୟମକୁ ସୂଚନା ଦେଇଛନ୍ତି। ତେବେ ଏହି ଗିରଫଦାରୀ ପରେ ଘଟଣାର ତଦନ୍ତ କେଉଁ ଦିଗକୁ ଗତି କରୁଛି ଏବଂ ଆଉ କେଉଁ ତଥ୍ୟ ସାମ୍ନାକୁ ଆସୁଛି, ତାହା ପୋଲିସର ପରବର୍ତ୍ତୀ ସୂଚନା ପରେ ସ୍ପଷ୍ଟ ହେବ।